Heimar birtu uppgjör fyrir fyrsta ársfjórðung 2026 fyrr í dag. EBITDA tímabilsins er lítillega umfram væntingar AKKUR á meðan hagnaður er langt yfir væntingum vegna meiri matsbreytinga en spá gerði ráð fyrir.

Hér að neðan má sjá samantekt á uppgjöri félagsins borið saman við spá AKKUR og fyrra ár.

Eins og sést á þessari samantekt eru tekjur og kostnaður yfir væntingum sem skilar sér í að EBITDA er lítillega yfir væntingum. Matsbreyting er langt yfir væntingum sem skilar sér í að hagnaður er sömuleiðis langt yfir væntingum.

Eins og sést á samanburði við fyrra ár er reksturinn að batna töluvert á milli ára í krónum talið á meðan framlegðarhlutföll lækka. Hafa ber í hug að nýjar eignir eru í rekstrinum á þessu ári og leiðrétt fyrir breytingum á eignasafni var rauntekjuvöxtur 2,8% á milli ára.

Jákvæðir punktar

1. Rekstrarhagnaður (EBITDA) er lítillega umfram væntingar (+41m eða +1,5%). EBITDA hlutfall lækkar um 47bps milli ára úr 66,4% í 66,0%, og er 126bps undir spá.

2. Áætlun ársins 2026 er lítillega umfram væntingar AKKUR. Í frumskýrslu var gert ráð fyrir að EBITDA 2026 væri tæplega 12ma. kr. Félagið hefur nú staðfest að horfur ársins verði við efri mörk áætlunnar sem er 12,15ma þar sem verðlag hefur hækkað meira en upphafleg áætlun gerði ráð fyrir. Hins vegar ber að nefna að verðmat í frumskýrslu var unnið á raungrunni og því eru áhrif á verðmat takmörkuð.

3. Matsbreyting fjárfestingareigna er langt umfram væntingar (+1,9ma eða +81,1%) og dreifist nokkuð jafnt yfir alla starfsþætti.

Neikvæðir punktar

1. Fjármagnskostnaður er töluvert yfir væntingum (+286m eða +7,1%) vegna mikillar verðbólgu á fjórðungnum. Líkt og komið var inn á að ofan þá var verðmat unnið á raungrunni og sveiflur í verðbólgu hafa því lítil sem engin áhrif á niðurstöðu verðmatsins.

Niðurstaða

Gott uppgjör þar sem rekstrarhagnaður er lítillega umfram væntingar og horfur ársins lítillega umfram væntingar.

Verðlagning

Miðað við dagslokagengi í dag er heildarvirði félagsins 211ma að teknu tilliti til eigin bréfa sem þýðir að það er metið á 17,7x EBITDA síðustu 12 mánaða (leiðrétt fyrir bókfærðu virði þróunareigna) eða 16,6x EBITDA ársins 2026 miðað við efri mörk áætlunar félagsins.

Heildarvirði á fermetra er 544þkr og P/B (leiðrétt fyrir tekjuskattsskuldbindingu) er 0,71x. 

Myndir hér að neðan sýna sögulega þróun á leiðréttu EV/EBITDA hlutfalli hlaupandi tólf mánuði frá skráningu auk þróun á P/B leiðréttu fyrir tekjuskattsskuldbindingu.

Kvika birti uppgjör fyrsta ársfjórðung 2026 fyrr í dag. Hagnaður tímabilsins er langt umfram væntingar AKKUR og eru allir liðir umfram væntingar nema þóknanatekjur.

Hér að neðan má sjá samantekt á uppgjöri bankans borið saman við spá AKKUR og fyrra ár.

Eins og sést á þessari samantekt eru kjarnatekjur lítillega umfram væntingar en rekstrarkostnaður töluvert undir væntingum sem skilar sér í að undirliggjandi hagnaður eru langt umfram væntingar.

Jákvæðir punktar

1. Vaxtamunur var mjög sterkur, eða 4,5%, og umfram væntingar á meðan útlánavöxtur var í samræmi við væntingar. Kvika er aðeins með hverfandi verðtryggingar(ó)jöfnuð og hefur há virk verðbólga á fjórðungnum nánast engin áhrif hjá þeim öfugt við stóru viðskiptabankana. Sterkur vaxtamunur skrifast því alfarið á góðan gang í undirliggjandi lánastarfsemi.

2. Rekstrarkostnaður var töluvert undir væntingum (+254m eða 7,8%) og lækkar um 2,5% milli ára.

3. Virðisrýrnun var langt undir væntingum AKKUR en líkt og áður hefur komið fram er minna vægi lagt á sveiflukennda liði líkt og virðisrýrnun. Gert er ráð fyrir að virðisrýrnun (e. cost of risk) verði 35-40bps á ári næstu árin.

4. Stjórn hefur lagt fram tillögu um sérstaka arðgreiðslu sem nemur 10,2mö og er yfir 14% af núverandi markaðsvirði. Auk þess er gefið til kynna félagið geti eigin bréf fyrir allt að 4ma til viðbótar sem er um 6% af markaðsvirði.

Neikvæðir punktar

1. Þóknanatekjur voru lítillega undir væntingum AKKUR (-50m eða 3,3%). Samkvæmt uppgjörskynningu eru þóknanatekjur að ná jafnvægi í kringum 1,5ma á fjórðungi. Eignir í stýringu lækka á fjórðungnum þar sem lífeyrissjóðir eru að taka fjármuni út stýringu.

Niðurstaða

Mjög sterkt uppgjör þar sem undirliggjandi hagnaður er langt umfram væntingar. Ljóst er að afkoma ársins verður mjög líklega töluvert umfram væntingar AKKUR.

Verðlagning

Miðað við dagslokagengi í dag er markaðsvirði bankans 71ma að teknu tilliti til eigin bréfa sem þýðir að hann er metinn á 12,8x hagnað síðustu 12 mánaða. Á P/B mælikvarða er bankinn er metinn á 1,07x bókfært eigið fé eða 1,55x efnislegt eigið fé.

Fyrr í dag birti Nasdaq verðbréfamiðstöð lista yfir 20 stærstu hluthafa (flestra) skráðra félaga. Hér að neðan má finna samantekt sem sýnir listann niður á félög ásamt breytingu á milli mánaða og á árinu ásamt upplýsingum um veltu og gengisþróun félaganna.

Líkt og áður er yfirlit yfir kaup og sölur 8 stærstu lífeyrisjóðanna eftir félögum Bent er á að þetta er gróf nálgun sem byggir á meðalverði félaganna í mánuðinum og að það vantar nokkur félag í samantektina (ALVO, AMRQ, HAMP, ISF, JBTM, OCS).

ATH - VEGNA SAMEININGAR ALMENNA LÍFEYRISSJÓÐSINS OG LÍFSVERKS MIÐAST BREYTINGAR ÁRSINS AÐEINS VIÐ BREYTINGAR FRÁ LOK JANÚAR HJÁ SJÓÐNUM.

Eins og sést var misjafnt eftir félögum (og sjóðum) hvort lífeyrissjóðir voru nettó kaupendur eða seljendur í síðastliðnum mánuði.

Reitir birtu uppgjör fyrir fyrsta ársfjórðung 2026 fyrr í dag. EBITDA tímabilsins er lítillega umfram væntingar AKKUR á meðan hagnaður er töluvert undir væntingum vegna meiri verðbólguáhrifa en spá gerði ráð fyrir.

Hér að neðan má sjá samantekt á uppgjöri félagsins borið saman við spá AKKUR og fyrra ár.

Eins og sést á þessari samantekt eru tekjur lítillega yfir væntingum og kostnaður í samræmi við væntingar, og þ.a.l. EBITDA lítillega yfir væntingum. Matsbreyting og fjármagnsgjöld eru töluvert yfir væntingum.

Eins og sést á samanburði við fyrra ár er reksturinn að batna töluvert á milli ára. Tekjur aukast um 11,8% og EBITDA um 14,7%. Líkt og kom fram í frumskýrslu AKKUR um Reiti er gert ráð fyrir að þessi þróun haldi áfram eftir því sem nýjar eignir og þróunarverkefni verða tekjuberandi.

Jákvæðir punktar

1. Rekstrarhagnaður (EBITDA) er lítillega umfram væntingar (+77m eða +2,5%). EBITDA hlutfall hækkar um 170bps milli ára í 66,8% úr 65,1%, og er 56bps yfir spá.

2. Matsbreyting fjárfestingareigna er töluvert umfram væntingar (+319m eða +12,7%) og dreifist nokkuð jafnt yfir alla starfsþætti.

3. Áætlun ársins 2026 er lítillega umfram væntingar AKKUR. Í frumskýrslu var gert ráð fyrir EBITDA 2026 að upphæð 12,9ma. kr. Áætlun félagsins hljóðar upp á 13,0-13,3ma. kr. og félagið tilkynnir nú að horfur liggja við efri mörk bilsins þar sem verðlag hefur hækkað meira en upphafleg áætlun gerði ráð fyrir. Hins vegar ber að nefna að verðmat í frumskýrslu var unnið á raungrunni og því eru áhrif á verðmat takmörkuð.

Neikvæðir punktar

1. Hreinn fjármagnskostnaður er töluvert yfir væntingum (+630m eða +14,6%) vegna mikilla verðbóta á verðtryggðum skuldum en verðbætur hækka um 169% á milli ára. Þrátt fyrir að rekstur batni um 14,7% á milli ára þá lækkar hreinn hagnaður um 21,6% vegna verðbólguáhrifa. Líkt og komið var inn á að ofan þá var verðmat unnið á raungrunni og sveiflur í verðbólgu hafa því lítil sem engin áhrif á niðurstöðu verðmatsins.

Niðurstaða

Gott uppgjör þar sem rekstrarhagnaður er lítillega umfram væntingar og horfur ársins lítillega umfram væntingar.

Verðlagning

Miðað við dagslokagengi í dag er heildarvirði félagsins 233ma að teknu tilliti til eigin bréfa sem þýðir að það er metið á 16,9x EBITDA síðustu 12 mánaða (leiðrétt fyrir bókfærðu virði þróunareigna) eða 15,9x EBITDA ársins 2026 miðað við efri mörk áætlunar félagsins.

Heildarvirði á fermetra er tæplega 485þkr og P/B (leiðrétt fyrir tekjuskattsskuldbindingu) er 0,77x. 

Myndin hér að neðan sýnir sögulega þróun á leiðréttu EV/EBITDA hlutfalli hlaupandi tólf mánuði frá skráningu.

Íslandsbanki birti uppgjör fyrir fyrsta ársfjórðung 2026 fyrr í dag. Hagnaður er töluvert umfram væntingar AKKUR og litast af mjög sterkum vaxtatekjum. Kjarnatekjur og undirliggjandi hagnaður er sömuleiðis umfram væntingar.

Hér að neðan má sjá samantekt á uppgjöri bankans borið saman við spá AKKUR og meðaltal greiningaraðila.

Eins og sést á þessari samantekt eru hreinar vaxtatekjur langt umfram væntingar á meðan þóknanatekjur eru lítillega yfir væntingum. Aðrar tekjur, þ.á.m. fjármunatekjur, eru yfir væntingum. Þetta skilar sér í því að kjarnatekjur eru töluvert umfram væntingar.

Rekstrarkostnaður var hins vegar lítillega yfir væntingum, leiðrétt fyrir 247m kostnaðarfærslu sem tengist kaupaukakerfi sem var innleitt í byrjun árs var hann hins vegar undir væntingum. Undirliggjandi hagnaður er töluvert umfram væntingar AKKUR. Undirliggjandi hagnaður heldur áfram að aukast bæði milli ára og á tólf mánaða takti, eins og sést á meðfylgjandi mynd.

Virðisrýrnun var yfir væntingum AKKUR og nam áhættukostnaður útlána 35 punktum á ársgrundvelli.

Jákvæðir punktar

1. Vaxtatekjur og vaxtamunur langt umfram væntingar. Hreinar vaxtatekjur námu 17,1ma og voru rúmum 14% yfir spá AKKUR. Vaxtamunur var 3,9% á fjórðungnum samanborið við 3,2% á sama fjórðungi í fyrra. Stærstur hluti hækkunarinnar skýrist af verðbólguáhrifum en hún skýrir ekki allan batann.

2. Fjármunatekjur umfram væntingar. Hrein fjármagnsgjöld námu 213m á fjórðungnum samanborið við 986m á sama fjórðungi í fyrra og bætti sá liður afkomuna umtalsvert milli ára. Líkt og áður hefur komið fram er reynt að horfa framhjá sveiflum í fjármunatekjum og gert ráð fyrir að til lengri tíma sé afkoman jákvæð.

3. Umfram eigið fé bankans nemur u.þ.b. 33ma og er það um 13% af markaðsvirði bankans. Bankinn hefur staðið í töluverðum endurkaupum á eigin bréfum sem mun halda áfram.

Neikvæðir punktar

1. Virðisrýrnun var yfir væntingum. Áhættukostnaður útlána nam 35 punktum á ársgrundvelli á fjórðungnum, sem er yfir framsýnu viðmiði bankans um 20–25 punkta í gegnum hagsveifluna. Eins og AKKUR hefur áður bent á er ekki ólíklegt að virðisrýrnun muni aukast tímabundið ef atvinnuleysi heldur áfram að aukast og/eða helst hátt og/eða ef íbúðaverð gefur eftir.

Niðurstaða

Gott uppgjör þar sem hagnaður tímabilsins var töluvert umfram væntingar. Kjarnatekjur, sérstaklega vaxtatekjur, bera afkomuna uppi og nemur arðsemi eigin fjár 13,6% á ársgrundvelli sem er talsvert yfir 12% áætlun bankans fyrir árið 2026. Á sama tíma heldur bankinn áfram með skipulagsbreytingar sem áætlað er að lækki árlegan launakostnað um 1ma sem koma að fullu leyti fram árið 2027.

Verðlagning

Miðað við dagslokagengi í dag er markaðsvirði bankans 249ma að teknu tilliti til eigin bréfa sem þýðir að hann er metinn á 9,1x hagnað síðustu 12 mánaða eða 9,4x hagnað ársins 2026 miðað við síðustu spá AKKUR. Á P/B mælikvarða er bankinn er metinn á 1,17x bókfært eigið fé.

Tvær myndir fá að fylgja sem sýna annars vegar þróun á V/H hlutfalli m.v. hlaupandi tólf mánaða hagnað og undirliggjandi hagnað fyrir skatta auk þess að sýna hvernig hlutföllin líta út fyrir 2026 m.v. spá AKKUR.

Arion banki birti uppgjör fyrir fyrsta ársfjórðung 2026 fyrr í dag. Hagnaður tímabilsins er yfir væntingum AKKUR og góður gangur í undirliggjandi rekstri.

Hér að neðan má sjá samantekt á uppgjöri félagsins borið saman við spá AKKUR og meðaltal greiningaraðila.

Eins og sést á þessari samantekt eru hreinar vaxtatekjur langt yfir væntingum AKKUR og þóknanatekjur undir væntingum. Fjármunatekjur voru undir væntingum á meðan afkoma af tryggingum og aðrar tekjur eru í samræmi við væntingar. Rekstrarkostnaður var lítillega yfir væntingum en virðisrýrnun langt undir væntingum.

Jákvæðir punktar

1. Hreinar vaxtatekjur og vaxtamunur voru langt yfir væntingum. Vaxtamunur fjórðungsins nam 3,8% borið saman við 3,1% á fyrra ári. Sveiflur skýrast að mestu af verðbólguáhrifum á fjórðungnum. Til lengri tíma er gert ráð fyrir vaxtamuni um eða lítillega yfir 3% á ári.

2. Virðisrýrnun var langt undir væntingum eða 51,3% undir spá AKKUR. Líkt og áður hefur komið fram er ekki horft mikið á sveiflurnar í þessum lið og frekar horft til þess að til lengri tíma sé virðisrýrnun um 0,20–0,25% af lánabók.

3. Kjarnarekstur er sterkur og undirliggjandi hagnaður heldur áfram að aukast. Kjarnatekjur jukust um 20,3% milli ára og undirliggjandi hagnaður fyrir skatta var 8,1% yfir spá AKKUR.

Neikvæðir punktar

1. Þóknanatekjur voru undir væntingum og var það alfarið vegna lægri tekna af lánastarfsemi. Þessar þóknanir eru sveiflukenndar og því ekki horft of mikið í niðurstöðuna á einum fjórðungi.

2. Fjármunatekjur voru undir væntingum. Niðurfærsla á óskráðum hlutabréfum reið baggamuninn.

Niðurstaða

Sterkt uppgjör þar sem hagnaður var umfram væntingar AKKUR. Kjarnarekstur er sterkur og töluvert umfram væntingar og undirliggjandi hagnaður fyrir skatta 8,1% yfir spá. Vaxtatekjur eru ýktar á fjórðungnum vegna óvenju hárrar virkrar verðbólgu sem mun jafnast út yfir tíma.

Verðlagning

Miðað við dagslokagengi í dag er markaðsvirði bankans 271ma að teknu tilliti til eigin bréfa. Hann er því metinn á 8,5x hagnað síðustu 12 mánaða eða 8,6x hagnað ársins 2026 skv. síðustu spá AKKUR. Á P/B mælikvarða er bankinn metinn á 1,33x bókfært eigið fé hluthafa bankans.

Tvær myndir fá að fylgja sem sýna annars vegar þróun á V/H hlutfalli m.v. hlaupandi tólf mánaða hagnað og undirliggjandi hagnað fyrir skatta auk þess að sýna hvernig hlutföllin líta út fyrir 2026 m.v. spá AKKUR.

Nova birti uppgjör fyrir fyrsta ársfjórðung 2026 á fimmtudaginn. EBITDA tímabilsins er töluvert undir væntingum AKKUR og hagnaður er langt undir væntingum. Hins vegar þarf að hafa í huga að væntingar voru byggðar á takmörkuðum upplýsingum vegna mikilla breytinga á rekstri félagsins um áramótin. Af sömu ástæðu segir samanburður við fyrra ár okkur takmarkað.

Þar sem niðurstaðan var í samræmi við áætlun stjórnenda og afkomuspá ársins er óbreytt má velta fyrir sér hvort árstíðarsveifla í rekstri muni aukast eftir breytingar. Til að félagið nái miðgildi afkomuspár þarf EBITDA fyrsta ársfjórðungs að vera 20% af niðurstöðu ársins en sögulega hefur fyrsti ársfjórðungur skilað 23% af EBITDA ársins að meðaltali.

Hér að neðan má sjá samantekt á uppgjöri félagsins borið saman við spá AKKUR og fyrra ár.

Eins og sést á þessari samantekt eru tekjur lítillega undir væntingum en allir kostnaðarliðir eru yfir væntingum og endar EBITDA því töluvert undir væntingum. Þegar tekið er tillit til einskiptisliða er afkoma ennþá undir væntingum.

Jákvæðir punktar

1. Áfram er sterkur tekjuvöxtur hjá félaginu en tekjur af FastNeti aukast um 9,5% á milli ára.

2. Þrátt fyrir að afkoma sé undir væntingum stendur félagið við afkomuspá sína. Framtíðarhorfur félagsins hafa ekki breyst og því lítil áhrif á verðmæti.

3. Töluvert dulið virði er í Sendafélaginu að mati AKKUR. Ef settur er “eðlilegur” margfaldari á rekstur Sendafélagsins er fólginn EV/EBITDA margfaldari Nova aðeins um 3,5-4,5x. Virði eignarhlutar Nova í Sendafélaginu er nálægt því að vera jafn eiginfjárvirði Nova í dag.

Neikvæðir punktar

1. Kostnaður eykst umfram væntingar. Félagið bætti við starfsfólki á síðasta ári sem jók kostnaðargrunn á sama tíma og töluverður kostnaðarþrýstingur er í hagkerfinu. Stjórnendur eru að vinda ofan af þeirri þróun með hagræðingaraðgerðum sem eiga að skila 5,4% lækkun kostnaðargrunns á ársgrundvelli þegar líður á árið.

Niðurstaða

Uppgjör undir væntingum þar sem væntingar byggðu á takmörkuðum upplýsingum. Uppgjörið virðist vera í samræmi við væntingar stjórnenda þar sem afkomuspá er óbreytt og þ.a.l. eru lítil áhrif á verðmat.

Verðlagning

Miðað við dagslokagengi í dag er heildarvirði félagsins 23ma, en 21,5ma leiðrétt fyrir bókfærðu virði Sendafélagsins sem telur ekki inn í EBITDA eða EBIT lengur. Félagið er því metið á 6,5x EBITDA ársins 2026 (miðað við miðgildi afkomuspár). Sé hins vegar hlutur NOVA í Sendafélaginu færður á einhverskonar “markaðsvirði” er verðlagning NOVA nær 3,5-4,5x EBITDA.

Festi birti uppgjör fyrir fyrsta ársfjórðung 2026 fyrr í dag. EBITDA tímabilsins er töluvert undir væntingum AKKUR og hagnaður er langt undir væntingum vegna hærri fjármagnskostnaðar en spá gerði ráð fyrir.

Hér að neðan má sjá samantekt á uppgjöri félagsins borið saman við spá AKKUR og fyrra ár.

Eins og sést á þessari samantekt eru tekjur töluvert yfir væntingum líkt og kostnaðarverð seldra vara og framlegð endar lítillega undir væntingum. Þessi mismunur skrifast nánast alfarið á meiri tekjur af eldsneytissölu á töluvert lægri framlegð en spá gerði ráð fyrir.

Rekstrarkostnaður er lítillega yfir væntingum og þ.a.l. EBITDA töluvert undir væntingum.

Afskriftir eru yfir væntingum og fjármagnsgjöld eru langt yfir væntingum og er því hagnaður langt undir væntingum. Hér er vert að benda á að mat AKKUR á fjármagnsgjöldum tók ekki nægilega vel tillit til virkrar verðbólgu á fjórðungnum og liggur munurinn fyrst og fremst í því.

Afkoma Krónunnar og ELKO er virkilega góð og eykst verulega milli ára á meðan afkoma N1 dregst verulega saman og afkoma Lyfju stendur í stað og EBIT lækkar milli ára þrátt fyrir mikla tekjuaukningu. Myndin hér að neðan sýnir þróun á EBIT eftir starfsþáttum milli ára.

Jákvæðir punktar

1. Tekjuvöxtur á fjórðungnum var töluvert umfram væntingar AKKUR. Þar munaði langmestu um mun minni tekjusamdrátt í eldsneytissölu en gert var ráð fyrir. Í afkomuspá var gert ráð fyrir nokkurn veginn óbreyttu magni og þ.a.l. gert ráð fyrir um 30% tekjusamdrætti vegna breytinga á eldsneytisgjöldum. Meðalverð á olíu var um $78 á tunnu á nýliðnum fjórðungi samanborið við $75 á sama fjórðungi í fyrra. USD veiktist gagnvart ISK um tæplega 10% á sama tíma þannig að meðalverð á olíu í ISK lækkaði um rúmlega 7% milli ára. Þetta benti því til meiri tekjusamdráttar en raunin varð þar sem selt magn jókst um 18%.

2. Líkt og myndin hér að ofan sýnir þá var gríðarlega góður gangur í Krónunni og ELKO á nýliðnum fjórðungi. Krónan er orðinn langstærsti einstaki starfsþátturinn og því jákvætt að góður gangur haldi áfram þar.

3. Þrátt fyrir að afkoma fjórðungsins sé undir væntingum AKKUR þá standa stjórnendur við áður útgefna EBITDA áætlun upp á 16,5-17,0makr. Það þýðir að EBITDA síðustu 9 mánuði ársins verður að aukast um 3-7%.

Neikvæðir punktar

1. Afkoma N1 var langt undir væntingum. Líkt og rakið var hér að ofan voru tekjur af eldsneytissölu engu að síður töluvert yfir væntingum en framlegðin langt undir væntingum. Miklar sveiflur innan fjórðungsins höfðu líklega mikil áhrif á afkomuna en olíuverð tæplega tvöfaldaðist í ISK frá upphafi fjórðungs til loka hans. Líkt og farið var yfir í frumskýrslu hefði breyting á eldsneytisgjöldum haft áhrif til hækkunar á framlegðarhlutföllum, að öðru óbreyttu, en niðurstaðan var lækkun. Þessar sveiflur ættu að jafnast út yfir tíma og afkoma N1 að styrkjast.

2. Rekstrarkostnaður var lítillega yfir væntingum eða um 50mkr. Samningsbundnar launahækkanir vegna kjarasamninga og fjölgun stöðugilda eykur launakostnað um 7,2% milli ára.

3. (Fjármagnsgjöld voru umfram væntingar en það skrifast að öllu leyti á vanmat AKKUR á áhrifum virkrar verðbólgu á fjórðungnum og er því sett innan sviga.)

Niðurstaða

Uppgjör undir væntingum sem skrifast að langmestu leyti á laka afkomu N1. Góður gangur hjá Krónunni og ELKO nær ekki að vega upp vonbrigðin hjá N1. Þrátt fyrir að afkoma sé undir væntingum stendur afkomuáætlun ársins og árið í heild lítur því vel út.

Verðlagning

Miðað við dagslokagengi í dag er heildarvirði félagsins 140ma sem þýðir að það er metið á 8,4x EBITDA ársins 2026 m.v. miðgildi áætlunar. Leiðrétt fyrir virði órekstrartengdra eigna lækkar margfaldarinn í 8,1x. EV/EBIT er 12,9x m.v. áætlun AKKUR eða 12,4x leiðrétt fyrir órekstrartengdum eignum.

Myndin hér að neðan sýnir sögulega þróun á EV/EBITDA hlutfalli, aðlöguðu fyrir fjárfestingu í hlutdeildarfélögum, hlaupandi tólf mánuði frá sameiningu N1 og Festis árið 2018. Eins og sjá má hefur verðlagningin sjaldan verið hagstæðari á þann mælikvarða.

Icelandair birti uppgjör fyrir fyrsta ársfjórðung 2026 fyrr í dag. Niðurstaðan er umfram væntingar AKKUR.

Hér að neðan má sjá samantekt á uppgjörinu borið saman við spá AKKUR og fyrra ár.

Eins og sést á þessari samantekt eru flutningstekjur og leigutekjur í samræmi við væntingar á meðan aðrar rekstrartekjur eru langt yfir væntingum, sem var fyrst og fremst vegna sölu á B767 vél.

Rekstrarkostnaður var lítillega yfir væntingum. Bæði EBITDA og EBIT eru töluvert yfir væntingum en vert er að benda á að hlutfallslegur samanburður verður bjagaður í báðar áttir þegar rekstrarframlegð er svona nálægt núlli eða neikvæð. Hærri fjármagnskostnaður gerir það svo að verkum að tap er lítillega undir væntingum.

Ef horft er framhjá sölu á B767 vélinni er afkoman í samræmi við væntingar en engu að síður sögulega sterkt uppgjör heilt yfir.

Jákvæðir punktar

1. Besti fyrsti ársfjórðungur félagsins a.m.k. síðastliðin 10 ár að mati AKKUR. EBITDA og EBIT hlutföll hafa aldrei verið hærri (minna neikvæð) á fyrsta fjórðungi og sýnir að stærðarhagkvæmni og tiltekt á kostnaðarhlið er að skila sér þótt vissulega megi alltaf gera betur.

2. Líkt og áður hefur verið vakin athygli á hafa einingatekjur þróast með mjög hagfelldum hætti undanfarin misseri (sjá mynd að neðan). Einingakostnaður án eldsneytis (CASK less fuel) hefur aldrei verið lægri á fjórðungnum frá því að félagið hóf að birta þann mælikvarða á miðju ári 2021. Munurinn á einingatekjum og einingakostnaði (RASK-CASK) hefur sjaldan verið minni á fyrsta ársfjórðungi.

3. Breytingar á leiðarkerfi virðast vera að virka þegar horft er til þess að sætanýting hefur sjaldan verið betri á sama tíma og þróun einingatekna- og kostnaðar er að þróast með jákvæðum hætti.

Neikvæðir punktar

1. Rekstrarkostnaður var lítillega yfir væntingum sem skrifast að mestu leyti á afgreiðslu-, lendingar- og yfirflugsgjöld sem voru $8m yfir væntingum. Tekjumyndun hefur verið mjög sterkt hjá félaginu og eru vandræði þess fyrst og fremst á kostnaðarhliðinni.

2. Horfur fyrir annan ársfjórðung eru lítillega undir væntingum AKKUR. Í síðustu afkomuspá var gert ráð fyrir að afkoma á öðrum ársfjórðungi yrði óbreytt frá fyrra ári en félagið gerir ráð fyrir að afkoman versni á milli ára. Samkvæmt félaginu er ástæðan fyrst og fremst hærra eldsneytisverð en það getur verið fljótt að breytast í báðar áttir.

Niðurstaða

Uppgjör fjórðungsins var gott og umfram væntingar AKKUR á meðan horfur fyrir annan ársfjórðung eru lítillega undir væntingum.

Verðmat AKKUR á Icelandair verður uppfært á næstu misserum ásamt afkomuspám fyrir komandi ár.

Verðlagning

Miðað við dagslokagengi í dag er markaðsvirði félagsins 33ma eða $269m. Heildarvirði félagsins er um 65ma eða $529m. Félagið er því metið á 3,2x EBITDA síðustu 12 mánaða og P/B 0,89x. EBIT rekstrarhagnaður og hagnaður félagsins síðustu 12 mánuði er ennþá neikvæður og þ.a.l. er EV/EBIT margfaldari félagsins -64x og V/H hlutfallið -25x.

Hér að neðan má finna samantekt sem sýnir afkomuspár fyrir fyrsta ársfjórðung hjá þeim félögum sem AKKUR fylgist með. Vakin er athygli á að á heimasíðu AKKUR má nálgast uppgjörsdagatal: https://akkur.beehiiv.com/dagatal

AKKUR hefur tekið saman yfirlit yfir eignasöfn (flestra) hlutabréfasjóða byggt á upplýsingum sem sjóðirnir birta sjálfir. Sjóðirnir birta lista yfir 10 stærstu eignir sínar í hverjum mánuði ásamt stærð sjóðsins hverju sinni.

Í skjalinu hér að neðan er yfirlit sem sýnir hvernig eignasöfn sjóðanna litu út um síðustu mánaðarmót ásamt breytingum frá því mánuði fyrr og samanburð við OMXI15 og OMX All Shares vísitölurnar.

Auk þess er samantekt um inn- og útflæði hlutabréfasjóða og innlánastöðu heimilanna.

Fróðleiksmoli dagsins

Fyrirvari

Samantektin byggir á upplýsingum sjóðanna um samsetningu um síðustu mánaðarmót og tekur AKKUR enga ábyrgð á því að upplýsingarnar séu réttar.

Hagar birtu uppgjör fyrir fjórða ársfjórðung fjárhagsársins 2025-2026 fyrr í dag. EBITDA tímabilsins er í samræmi við væntingar AKKUR á meðan hagnaður er undir væntingum vegna hærri afskrifta og fjármagnskostnaðar en spá gerði ráð fyrir.

Hér að neðan má sjá samantekt á uppgjöri félagsins borið saman við spá AKKUR og fyrra ár.

Eins og sést á þessari samantekt eru tekjur lítillega yfir væntingum sem og kostnaðarverð seldra vara og framlegð endar lítillega yfir væntingum. Rekstrarkostnaður er yfir væntingum og endar EBITDA í samræmi við væntingar. Afskriftir yfir væntingum og neikvætt endurmat fjárfestingarfasteigna gera það að verkum að EBIT er töluvert undir væntingum. Fjármagnskostnaður var yfir væntingum og hagnaður því töluvert undir væntingum.

Samanburður við fyrra ár sýnir að reksturinn er að styrkjast töluvert á milli ára. Tekjuvöxtur er 4,4% en sé leiðrétt fyrir áhrifum af breytingum á eldsneytisgjöldum er tekjuvöxturinn nær 6,5%.

Jákvæðir punktar

1. Tekjur voru lítillega yfir væntingum, eða 2,2%. Sterkur gangur á fjórðungnum þar sem heimsóknum fjölgaði um 6,8% og seldum stykkjum um 3,2%.

2. Framlegðarhlutfall eykst um 60bps á milli ára og er 10bps yfir væntingum. Hluti af skýringunni fyrir hækkun milli ára er breyting á eldsneytisgjöldum en sérstaklega er tekið fram í tilkynningu félagsins að framlegðarhlutfall hafi styrkst í bæði dagvöru- og eldsneytishluta.

3. Skuldsetning er hófleg en félagið skuldar núna um 2,5x EBITDA að leiguskuldbingum meðtöldum.

Neikvæðir punktar

1. EBIT og hagnaður var töluvert undir væntingum og helgast af hærri afskriftum, neikvæðu endurmati fjárfestingarfasteigna og hærri fjármagnskostnaði en gert var ráð fyrir. Þessir liðir hafa ekki bein áhrif á niðurstöðu verðmatsins og hafa því minna vægi.

Niðurstaða

Gott uppgjör þar sem EBITDA er í samræmi við væntingar og áætlun næsta ár er sömuleiðis í samræmi við væntingar. Leiðrétt fyrir einskiptiskostnaði vegna Álfabakka gerir áætlun ráð fyrir 7,7% vexti EBITDA milli ára.

Verðlagning

Miðað við dagslokagengi í dag er heildarvirði félagsins 178ma sem þýðir að það er metið á 9,4x EBITDA ársins 2025 eða 8,7x áætlaða EBITDA ársins 2026 (leiðrétt fyrir einskiptiskostnaði) miðað við miðgildi áætlunar.

Myndin hér að neðan sýnir sögulega þróun á EV/EBITDA hlutfalli, aðlöguðu fyrir fjárfestingu í hlutdeildarfélögum, hlaupandi tólf mánuði frá árinu 2012.

Í gær birti Nasdaq verðbréfamiðstöð lista yfir 20 stærstu hluthafa (flestra) skráðra félaga. Hér að neðan má finna samantekt sem sýnir listann niður á félög ásamt breytingu á milli mánaða og á árinu ásamt upplýsingum um veltu og gengisþróun félaganna.

Líkt og áður er yfirlit yfir kaup og sölur 8 stærstu lífeyrisjóðanna eftir félögum Bent er á að þetta er gróf nálgun sem byggir á meðalverði félaganna í mánuðinum og að það vantar nokkur félag í samantektina (ALVO, AMRQ, HAMP, ISF, JBTM, OCS).

ATH - VEGNA SAMEININGAR ALMENNA LÍFEYRISSJÓÐSINS OG LÍFSVERKS MIÐAST BREYTINGAR ÁRSINS AÐEINS VIÐ BREYTINGAR FRÁ LOK JANÚAR HJÁ SJÓÐNUM.

Eins og sést var misjafnt eftir félögum (og sjóðum) hvort lífeyrissjóðir voru nettó kaupendur eða seljendur í síðastliðnum mánuði.

Þáttur 4 af spjallið með AKKUR er kominn í loftið.

Gestur þáttarins er Sveinn Þórarinsson, hlutabréfagreinandi hjá Arctica Finance. Rætt var um Haga í samhengi við frumskýrslu AKKUR um félagið auk þess sem íslenski hlutabréfamarkaðurinn var ræddur í víðara samhengi.

Sveinn er hokinn af reynslu þegar kemur að greiningum á innlendum hlutabréfum og fáir sem þekkja félögin jafn vel og hann. Allt áhugafólk um hlutabréfamarkaðinn ættu að finna eitthvað áhugavert í þættinum.

Þættirnir eru aðgengilegir á Spotify, YouTube og Apple Podcast.

AKKUR hefur tekið saman yfirlit yfir eignasöfn (flestra) hlutabréfasjóða byggt á upplýsingum sem sjóðirnir birta sjálfir. Sjóðirnir birta lista yfir 10 stærstu eignir sínar í hverjum mánuði ásamt stærð sjóðsins hverju sinni.

Í skjalinu hér að neðan er yfirlit sem sýnir hvernig eignasöfn sjóðanna litu út um síðustu mánaðarmót ásamt breytingum frá því mánuði fyrr og samanburð við OMXI15 og OMX All Shares vísitölurnar.

Auk þess er samantekt um inn- og útflæði hlutabréfasjóða og innlánastöðu heimilanna.

Fróðleiksmoli dagsins

Fyrirvari

Samantektin byggir á upplýsingum sjóðanna um samsetningu um síðustu mánaðarmót og tekur AKKUR enga ábyrgð á því að upplýsingarnar séu réttar.

Í kjölfar innrásar Bandaríkjanna og Ísraels í Íran hefur olíuverð hækkað yfir 40%. Fjárfestar velta því eðlilega fyrir sér hvaða áhrif það hefur á ýmis fyrirtæki og þ.m.t. Icelandair. AKKUR lagðist því í greiningarvinnu til að átta sig á mögulegum áhrifum.

Til að byrja með er rétt að benda á að verð á þotueldsneyti fylgir alls ekki verði á hráolíu fullkomlega. Munurinn á verði á hráolíu og þotueldsneyti er jafnan kallað “crack spread” (köllum það einfaldlega “álagið” hér að neðan).

Þróun á álaginu stýrist meðal annars af því hver eftirspurn flugfélaga er eftir þotueldsneyti á hverjum tíma og framboði þess. T.d. skiptir máli hvaðan hráolían kemur sem er unnin er áfram í þotueldsneyti, hversu mikil framleiðslugeta er til staðar hjá hreinsunarstöðvum o.s.frv.

Verð á þotueldsneyti hefur hækkað yfir 50% frá innrásinni og álagið því aukist.

Áhrif olíuverðs

Árið 2025 var eldsneytiskostnaður félagsins (með tapi af eldsneytisvörnum) USDm 317 og virkt eldsneytisverð á árinu var USD 821/mt. Meðalverð á þotueldsneyti á árinu var hins vegar í kringum USD 711/mt og var Icelandair því að greiða töluvert hærra verð en meðalverð ársins sem stafar m.a. af því að félagið var með eldsneytisvarnir í upphafi ársins á ennþá hærri verðum.

Nú hefur staðan snúist við og félagið var búið að vera 39% af notkun ársins 2026 í lok árs 2025 á meðalverðinu USD 671/mt.

Taflan hér að neðan sýnir hver áhrifin af mismunandi verði á þotueldsneyti á heildarkostnað ársins. Sem dæmi ef þotueldsneyti mun kosta að meðaltali USD 1.100/mt á árinu væri það aukning á eldsneytiskostnaði ársins um u,þ.b. USDm 40 eða 13,8%.

Líklega hafa fjárfestar ofmetið áhrifin af hækkun olíuverðs. Þar sem félagið var búið að verja um 40% af notkun á töluvert hagstæðari verðum auk þess sem virkt eldsneytisverð var óhagstætt í fyrra eru áhrifin á árið 2026 ekki jafn mikil og margir gætu óttast.

Áhrif á tekjur

Hér eru tveir kraftar sem togast á. Annars vegar hefur hækkun olíuverðs áhrif til hækkunar á flugfargjöld, sérstaklega á flugi yfir Atlantshafið þar sem flugfélög í Bandaríkjunum nota almennt ekki eldsneytisvarnir.

Á móti kemur hafa stríðsátök almennt séð þau áhrif að draga úr ferðavilja og hafa þar með áhrif til lækkunar á flugfargjöld og/eða tekjur. Minni ferðavilji myndi hins vegar þýða að eftirspurn flugfélaga eftir þotueldsneyti dregst saman sem hefur áhrif til lækkunar á álagið og/eða hráolíuverð.

Niðurstaða

Það þarf ekki að velkjast í vafa um að áhrif stríðsins eru neikvæð en að mati AKKUR var markaðurinn að ofmeta áhrif hærra olíuverðs. Stóra spurningin er hvort og hversu mikil áhrif átökin koma til með að hafa á ferðavilja og þar er áhættan niður á við. Á móti kemur myndi það einnig hafa áhrif til lækkunar á eldsneytisverðið.

Farþegatölur

Icelandair birti farþegatölur fyrir febrúar þann 6. mars sem má sjá hér.

Tölurnar voru virkilega sterkar og óhætt að segja að tekjuhliðin sé búin að vera virkilega sterk hjá félaginu undanfarin misseri, eða frá og með síðasta hausti.

Meðalverð (e. yield) hafa hækkað statt og stöðugt frá því í júlí sl. þegar þær eru bornar saman við fyrra ár. Á fyrstu tveimur mánuðum ársins eru meðalverð 8,3% hærri en á sama tíma fyrir ári og tekjur félagsins að aukast um hátt í 25% þar sem framboðið eykst töluvert (14%).

Myndin hér að ofan sýnir ágætlega hvernig meðalverð hafa þróast með jákvæðum hætti frá miðbiki síðasta árs.

Í gær birti Nasdaq verðbréfamiðstöð lista yfir 20 stærstu hluthafa (flestra) skráðra félaga. Hér að neðan má finna samantekt sem sýnir listann niður á félög ásamt breytingu á milli mánaða og á árinu ásamt upplýsingum um veltu og gengisþróun félaganna.

Líkt og áður er yfirlit yfir kaup og sölur 8 stærstu lífeyrisjóðanna eftir félögum Bent er á að þetta er gróf nálgun sem byggir á meðalverði félaganna í mánuðinum og að það vantar nokkur félag í samantektina (ALVO, AMRQ, HAMP, ISF, JBTM, OCS).

ATH - VEGNA SAMEININGAR ALMENNA LÍFEYRISSJÓÐSINS OG LÍFSVERKS MIÐAST BREYTINGAR ÁRSINS AÐEINS VIÐ BREYTINGAR FRÁ LOK JANÚAR HJÁ SJÓÐNUM.

Eins og sést var misjafnt eftir félögum (og sjóðum) hvort lífeyrissjóðir voru nettó kaupendur eða seljendur í síðastliðnum mánuði.

Nova birti uppgjör fyrir fjórða ársfjórðung 2025 og árið í heild fyrr í dag. EBITDA tímabilsins er töluvert umfram væntingar AKKUR og hagnaður er langt umfram væntingar. Þessi munur er að mestu tilkominn vegna tekjufærslu vegna framsals á eignum og rekstri til Sendafélagsins og eru því einskiptisliðir.

Hér að neðan má sjá samantekt á uppgjöri félagsins borið saman við spá AKKUR og fyrra ár.

Eins og sést á þessari samantekt eru tekjur töluvert yfir væntingum (+13,4%) en sé leiðrétt fyrir einskiptisliðum er munurinn minni (+7,5%). Kostnaður er yfir væntingum og endar EBITDA yfir væntingum (+8,6%). Það voru einnig einskiptisliðir á kostnaðarhliðinni og þegar leiðrétt er fyrir einskiptisliðum, bæði á tekjur- og kostnaðarhlið, er afkoma í samræmi við væntingar.

Jákvæðir punktar

1. Tekjur voru töluvert umfram væntingar en að miklu leyti vegna einskiptistekna. Leiðrétt fyrir einskiptistekjum er tekjuvöxtur á fjórða ársfjórðungi engu að síður 7,5% yfir væntingum og aukast um 9,2% milli ára.

2. Töluvert dulið virði er í Sendafélaginu að mati AKKUR. Ef settur er “eðlilegur” margfaldari á rekstur Sendafélagsins er fólginn EV/EBITDA margfaldari Nova aðeins um 4-5x. Virði eignarhlutar Nova í Sendafélaginu er nálægt því að vera jafn eiginfjárvirði Nova í dag.

Neikvæðir punktar

1. Kostnaður eykst umfram væntingar. Mestu munar um kostnaðarverð seldra vara (KSV) sem tengist tekjuvexti umfram væntingar. Þ.e.a.s. vörusala, sem er með hærra KSV en aðrar tekjur, var umfram væntingar sem eykur þá KSV. Kostnaður fyrir árið í heild eykst um 9,3% á milli ára eða 8,1% leiðrétt fyrir einskiptisliðum.

Niðurstaða

Ágætt uppgjör þar sem afkoma síðasta árs og afkomuspá ársins er í samræmi við væntingar.

Verðlagning

Miðað við dagslokagengi í dag er heildarvirði félagsins 24ma að teknu tilliti til eigin bréfa sem þýðir að það er metið á 7,1x EBITDA ársins 2026 (miðað við miðgildi afkomuspár). Sé hins vegar leiðrétt fyrir hlut Nova í Sendafélaginu er verðlagning nær 4-5x EBITDA.